Pazkoaldiko V. astelehena
I. Irakurgaia
Barri on hau
adierazoten deutsuegu:
itzi
dagizuezala idolo gauzeztanak eta bihurtu zaitezela Jainko biziagana.
Apostoluen Eginak liburutik
Eg 14, 5-18
Egun hareetan, jentilak eta judeguak, euren
agintariekin batera, Paulo eta Bernabe iraindu eta harrikatzeko asmotan
ebiltzan Ikonion; baina, horretaz jaubeturik, Likaoniako Listra eta Derbeko
herritxu eta inguruetara ihes egin eben Paulok eta Bernabek, eta han be Barri
Ona zabaltzen jardun eben.
Bazan Listran oinak elbarri ebazan gizon
bat; sekula oinez ibili bakoa zan, jaiotzatik egoan-eta elbarri. Paulori
entzuten egoan baten, Paulo begira-begira jarri jakon eta, osatzeko adinako
sinismena baebala ikusirik, oihu handiz esan eutson: «Jarri zutunik oinen
gainean». Salto baten zutundu eta ibiltzen hasi zan.
Paulok egindakoa ikustean, jentetza oihuka
hasi zan Likaoniako hizkuntzan: «Jainkoak jaitsi jakuz geure artera giza
irudian!» Bernaberi «Zeus» esaten eutsoen, eta Paulori «Hermes», honek hitz
egiten eban-eta. Herriko sarreran egoan Zeusen tenpluko abadeak zezenak
ekarriazo ebazan, lore-sortaz apaindurik, uriko ateetara, eta jenteagaz batera
oparitzat hil nahi ebazan apostoluen omenez.
Ohartu ziranean, Bernabe eta Paulo
apostoluak euren soingainekoak urratu eta jentearen artera sartu ziran oihuka:
«Lagunok, zetan diharduzue? Gu be gizakiak gara zuek lez, eta barri on hau
adierazoten deutsuegu, hain zuzen: itzi dagizuezala idolo gauzeztanak eta
bihurtu zaitezela Jainko biziagana, zeru-lurrak, itsasoa eta horreetan dagoan
guztia egin dituanagana. Joandako gizaldietan Jainkoak herri bakotxari bere
bidetik joaten itzi deutsa; baina ez bere burua ezagutzera emon barik, egiten
dituan mesedeen bidez: euria eta urtaro aberatsak bialdu deutsuez zerutik, eta
janariz eta pozez bete zaitue».
Berba honeekin, nekez bada be, kendu eutsoen
burutik jenteari oparia eskeintzeko asmoa.
Jaunak esana
Erantzun salmoa
Sal 115 [113 B], 1-2. 3-4. 15-16 (R/. 1)
R/. Ez gugaitik, Jauna,
zeure izenaren ohoreagaitik baino
erakutsi zeure ospea.
Edo: Aleluia.
V/. Ez gugaitik, Jauna, ez gugaitik,
zeure
izenaren ohoreagaitik baino
erakutsi
zeure ospea,
zeure
maitasun eta leialtasunagaitik.
Zergaitik
dinoe jentil-herriek:
«Non dabe Jainkoa?» R/.
V/. Gure Jainkoa zeruan dago
eta
nahi dauan guztia egiten dau.
Hareen
idoloak, barriz, zidar eta urre dira,
gizakien
eskulan. R/.
V/. Bedeinkatu zagiezala Jaunak,
zeru-lurrak
egin dituanak.
Jaunarena
da zerua,
gizakien
esku itzi dau lurra. R/.
Aleluia
Jn 14, 26
R/. Aleluia.
V/. Espiritu Santuak irakatsiko deutsue dana
eta
gogoratuazoko Nik esan deutsuedan guztia. R/.
Ebanjelioa
Aitak
Laguntzailea bialduko deutsue;
harek
irakatsiko deutsue dana.
✠ Jesu Kristoren Ebanjelioa San Joanen liburutik
Jn 14, 21-26
Aldi haretan, Jesusek esan eutsen ikasleei:
«Nire aginduak onartu eta betetzen dituanak, horrexek nau maite, eta Ni maite
nauana nire Aitak maiteko dau, eta Neuk be maite izango dot eta agertuko
naiako».
Esan eutson Judasek, ez Iskariotek, besteak
baino: «Jauna, zer dala-eta agertuko zaiakuz guri eta ez munduari?»
Jesusek erantzun eutson: «Ni maite nauanak
gordeko dau nire berbea; nire Aitak maiteko dau, eta Aita eta biok harengana
etorriko gara eta harengan egingo dogu bizilekua. Ni maite ez nauanak, ostera,
ez ditu gordetzen nire berbak. Eta entzuten dozuen berbea ez da nirea, bialdu
nauan Aitarena baino.
Zuekin nazan artean esan deutsuet hau. Baina
Aitak Laguntzailea, Espiritu Santua, bialduko deutsue nire izenean; harek
irakatsiko deutsue dana eta gogora ekarriko Nik esan deutsuedan guztia».
Jaunak esana
Iruzkina
Zenbat eta zenbat Jesusegazko bizikizun ete dagozan ebanjelioak hemen agertzen dauanaren ostean. Emoten dau bat-batean dinozala Jesusek berbok; baina egia besterik da: haregazko bizitzaldian han-hor-hemen entzun deutsoezan Jesusen hausnarketak dira.
Ez daigun begi bistatik galdu: Jesus aintzatuaren (berbizkunde ondoren, ba) argitara irakurrita dagoz berbok, baina aurretiko bizikizunak dira, eta denpora luzean emonak.
Berbizkunde ondoren konturatuko dira, eta hasten dira ulertzen, Aita eta Jesus, eta Jesus eta Espiritua, eta Espiritua eta Aita bat dirala; ezin daitekezala banazean hartu edo ulertu.
Eta Jainkoa, Semeagan eta Espiritu Santuagan, beti dago geure artean, gu biziazoten, adoretzen, maitatzen…; eta maite dogunean, ezelango baldintza eta bereizketa barik, konturatzen gara Jesusen agindu bakarra (maitasun agindua) beteten dihardugula.
Ez da, ba, gure gurarien eta ahaleginen ondorio maitatzea; Jainkoak gugan diharduana da. Konturatu gaitezala baino ez dogu behar.
Pazkoaldiko V. martitzena
I. Irakurgaia
Jainkoak euren
bidez egindako guztia
azaldu eutsoen
alkarteari.
Apostoluen Eginak liburutik
Eg 14, 19-28
Egun hareetan, judegu batzuk etorri ziran
Antiokiatik eta Ikoniotik eta, jentea eurenganaturik, Paulori harrika egin
eutsoen, eta uritik kanpora atara eben arrastaka, hilda egoalakoan. Baina
ikasleak ondora batu jakozanean, Paulo jagi eta urian sartu zan barriro.
Biharamonean, Derbera joan zan Bernabegaz.
Uri haretan Barri Ona zabaldu eta, ikasle asko egin ondoren, Listrara, Ikoniora
eta Antiokiara bihurtu ziran.
Bide batez, ikasleen bihotzak sendotzen
ebezan, sinismenean irauteko adore emonez. «Larrialdi asko jasan behar dogu
–esaten eutsien– Jainkoaren erreinuan sartzeko». Eleiz alkarte bakotxean
arduradunak izentatu ebezan eta, otoitz eta barau egin ondoren, Jaunaren
eskuetan itzi ebezan, harengan sinistu eben-eta.
Pisidian zehar, Panfiliara heldu ziran eta,
Pergen hitza iragarri ondoren, Ataliara jaitsi ziran. Han ontzia hartu eben
Siriako Antiokiara joateko, handik bialdu ebezan-eta burutu barria eben
egitekorako, Jainkoaren ardurapean jarri ondoren.
Heldu ziranean, eleiz alkartea batu eben eta
Jainkoak euren bidez egindako guztia azaldu eutsien, baita jentilei federako
atea zelan edegi eutsien be. Paulo eta Bernabe bertan gelditu ziran denboraldi
baten ikasleekin.
Jaunak esana
Erantzun salmoa
Sal 145 [144], 10-11. 12-13b. 21 (R/. ik. 12a)
R/. Zure adiskideek agertu begie, Jauna,
zure erregetzaren bikaintasuna.
Edo: Aleluia.
V/. Goratu zagiezala, Jauna, zeure sorkari
guztiek,
bedeinkatu
zeure fededunek;
aitatu
begie zure erregetza ospetsua,
berba
egin begie zure ahalmenaz. R/.
V/. Gizakiei agertuz zure egite ahaltsuak,
zure
erregetza ospetsuaren bikaintasuna.
Zure
erregetza betiko erregetza,
gizaldiz
gizaldikoa zure nagusitza. R/.
V/. Goratu begi nire ahoak Jauna,
eta
bedeinkatu begie izaki guztiek
haren
izen santua betiren beti. R/.
Aleluia
Ik. Lk 24, 46. 26
R/. Aleluia.
V/. Beharrezkoa zan Mesiasek sufritzea
eta
hilen artetik biztea;
holan
sartu behar eban bere aintzan. R/.
Ebanjelioa
Neure bakea emoten deutsuet.
✠ Jesu Kristoren Ebanjelioa San Joanen liburutik
Jn 14, 27-31a
Aldi haretan, Jesusek esan eutsen ikasleei:
«Bakea izten deutsuet, neure bakea emoten; Nik emoten deutsuedan bakea ez da
munduarena lakoa. Ez kezkatu, ez bildurrik izan. Entzun dozue esan deutsuedana:
“Banoa, baina bihurtuko naz zuokana”. Benetan maite baninduzue, poztuko
zintzakeze Aitagana noalako, Aita Ni baino handiagoa da-eta.
Orain esan deutsuet, gertatu baino lehen,
gertatu dadinean sinistu dagizuen. Ez dot behin honezkero luzaro hitz egingo
zuekin, ze, badator mundu honetako buruzagia. Horrek ez dauka ahalmenik nire
gain; baina munduak jakin behar dau Nik maite dodala Aita eta Aitaren agindua
bete egiten dodala».
Jaunak esana
Iruzkina
Ez da hain erreza Jesusen agur berbok ulertzea. Baina bai ulertu daitekela maite-maite dauzala bere ikasleak eta ez dauala nahi bere heriotzeaz bildurtu edo kezkatu daitezanik.
Hortik gorakoak… neure bakea emoten deutsuet, munduarena langoa ez dana… Zelangoa da Jesusek emoten dauan bakea? Zelangoa da munduarena?
Jesusena barru-barruko bakea da, eta bete-betekoa; ez dau bildurrarentzako lekurik, oraindixek dago-ta Aitagan. Halan ere, heriotzatik igaro beharra dauka. Halan erakusten deusku ez dala heriotzea azkena, bizitza baino: Aitagango bizitza.
Jesus maite dauana haren Aitaganatzeaz poztu egiten da, halan ikusten daualako betea maitasun eginkizuna. Eta maite dauanak berak ere beteko dau eginkizun hori mundu honetako Jauntxoaren gainetik.
Jesus haren menpe bizi ez dan lez bizi izango dira Jesus maite dabenak ere, honen helburu ber-bera izango dabelako Aitari esker.
Pazkoaldiko V. eguaztena
I. Irakurgaia
Jerusalemera
igon egiela erabagi eben,
apostoluekin
eta arduradunekin auzia argitzera.
Apostoluen Eginak liburutik
Eg 15, 1-6
Egun hareetan, Judeatik Antiokiara jaitsi
ziran batzuk irakaspen hau emoten hasi ziran hango senideei: «Moisesengandiko
usadioaren arabera zirkuntzidatzen ez bazarie, ezin zaitekeze salbatu». Hori
zala-eta, astrapala sortu zan eta Paulok eta Bernabek eztabaida gogorra izan
eben hareekin. Orduan, Paulo, Bernabe eta beste batzuk Jerusalemera igon egiela
erabagi eben, apostoluekin eta arduradunekin auzi hori argitzera.
Antiokiako eleiz alkarteak biderako
beharrezkoak emon eutsezan. Fenizian eta Samarian zehar igarotzean, jentilak be
konbertitzen ziharduela jakinazoten eutsien senideei, guztiei poz handia
emonez. Jerusalemera heldu ziranean, eleiz alkarteak, apostoluek eta
arduradunek harrera ona egin eutsien, eta Paulok eta Bernabek euren bidez
Jainkoak egindako guztiaren barri emon eutsien.
Baina sinistedun egindako fariseuen
alderdiko batzuek urten eben esanez jentilak be erdaindu egin behar zirala eta
Moisesen legea betetzera behartu. Orduan, apostoluak eta arduradunak arazo hau
aztertzeko batu ziran.
Jaunak esana
Erantzun salmoa
Sal 122 [121], 1-2. 3. 4-5 (R/. ik. 1b)
R/. Goazen pozik Jaunaren etxera!
Edo: Aleluia.
V/. Ha poza nirea, esan eustenean:
«Goazen Jaunaren etxera!»
Hona
orain nire oinak
zure
ateetan, Jerusalem. R/.
Jerusalem,
uri lez ondo eraikia,
beragan
sendo batua! R/.
V/. Hara igoten dabe leinuek, Jaunaren leinuek,
Israelen
lege danez, Jaunaren izena goratzera.
Han
dagoz ezarriak auzi-mahaiak,
Daviden
jauregiko mahaiak. R/.
Aleluia
Jn 15, 4a. 5b
R/. Aleluia.
V/. Zagoze Nigan, Ni zuengan lez, dino Jaunak;
norbait
Nigan badago,
horrek
frutu asko emongo dau. R/.
Ebanjelioa
Norbait Nigan
badago, Ni harengan lez,
harek frutu
asko emongo dau.
✠ Jesu Kristoren Ebanjelioa San Joanen liburutik
Jn 15, 1-8
Aldi haretan, Jesusek esan eutsen ikasleei:
«Neu naz benetako mahatsondoa, eta nire Aita da nekazaria. Nigan fruturik
emoten ez dauan aihena ebagi egiten dau Aitak, eta frutu emoten dauana garbitu
eta kimatu, frutu gehiago emon dagian. Zuek, honezkero, garbi zagoze, Nik
adierazo deutsuedan hitzari esker. Iraun egizue Nigan, Nik zuengan bezala.
Aihenak berez, mahatsondoan ez badago, fruturik emon ezin dauan lez, zuek be
ez, Nigan irauten ez badozue.
Neu
naz mahatsondoa eta zuek aihenak. Norbait Nigan badago, Ni harengan bezala,
harek frutu asko emongo dau; ze, Ni barik ezin dozue ezer egin. Nigan ez
dagoana kanpora botatzen dabe, ebagi eta igartzen dan aihenaren moduan; gero,
batu, surtara bota eta erre egiten dabe.
Nigan bazagoze eta nire berbak zuengan
badagoz, eskatu gura dozuena eta izango dozue. Honetan agertzen da nire Aitaren
aintza: zuek, nire ikasle izanik, frutu asko emotean».
Jaunak esana
IRUZKINA
Badaki Jesusek mahastiaren balioaz, eta Israel Etxea dala Jainkoaren mahastia. Baina hemen Jesus harago doa. Danek ezagutzen eben irudi hori erabiliz, Jesusek bere burua jarten dau mahasti horretako mahatsondo, eta ikasleak mahatsondo horretako aihen.
Balio barria emoten deutso, ba, israeldarren artean hain ezaguna dan irudiari. Aita da Nekazaria: berea da mahastia. Mahasti horretan Jesus da mahatsondo preziatua. Eta honen ikasleak dira mahatsondo horretako aihenak.
Eta horra: aihenak berez, mahatsondotik bereiztuta fruturik emon ezin dauanez, bardin ikasleek ere: Jesusengan txertatuak ezik, ezin daikee fruturik emon. Eta mahastizainaren guraria —Jainkoarena hain zuzen— frutu ugari emon daiela da.
Aparteko frutua, ugaria eta gozoa itxaroten dau Aitak bere Semearen mahatsondotik. Aitak berak garbitzen eta inausten ditu haren aihenak, emon daien frutua ugaria izan daiten, eta ez orri hutsa.
Ez gara surtarako aihen igarrak, frutu ugari emoteko garbituak baino. Eta hori, Jesusengan txertatuak egonik baino ezin izango dogu.
Pazkoaldiko V. eguena
I. Irakurgaia
Nire eretxiz,
ez jake alperreko oztoporik ezarri behar
Jainkoagana
bihurtzen diran jentilei.
Apostoluen Eginak liburutik
Eg 15, 7-21
Egun hareetan, eztabaida luzearen ondoren,
zutundu zan Pedro eta esan eutsen apostoluei eta arduradunei: «Anaiok,
dakizuenez, aspaldi aukeratu ninduan Jainkoak, jentilek nire ahotik Barri
Onaren hitza entzun egien eta sinistu. Eta bihotz-barrua ezagutzen dauan
Jainkoak hareen alde autormen egin eban, hareei be guri lez Espiritu Santua
emonez. Hareen eta gure artean ezelako bereizkuntzarik egin barik, garbitu egin
ditu hareen bihotzak fedearen bidez.
Holan, bada, zergaitik tentatzen dozue orain
Jainkoa, ez gure gurasoek ezta geuk be ezin eroan izan dogun buztarria ikasle
horreei leporatzen ahaleginduz? Guk uste dogu Jesus Jaunaren graziari esker
salbatzen gaituala Jainkoak, bai geu, bai jentilak».
Isildu zan Batzar osoa Bernaberi eta Paulori
entzuteko, eta honeek euren bitartez jentilen artean Jainkoak egindako
ezaugarriak eta mirariak kontatu ebezan. Amaitu ebenean, Santiagok hitza hartu
eta esan eutsen: «Entzun, anaiok! Simonek azaldu deusku zelan
hasiera-hasieratik Jainkoak jentilen artetik herri bat aukeratu nahi izan dauan
beretzat. Bat dator hau profeten esanekin, Liburu Santuak dinoan lez:
"Ondoren,
bihurtuko naz
eta
Daviden txabola jausia berreraikiko dot;
haren
horma hondatuak berreraikiko ditut,
eta
zutunik ipiniko dot barriro,
gainerako
gizakiek
eta
nire izenari sagaratuak dagozan nazino guztiek
Jauna
bilatu dagien.
Halan
dino Jaunak, hori aspalditik jakinazo dauanak".
Beraz, nire eretxiz, ez jake alperreko oztoporik ezarri behar Jainkoagana bihurtzen diran jentilei. Nahikoa da hauxe eskatuz idaztea: ez dagiela jan sasijainkoei eskeinitako haragirik, itzi dagiezala legearen kontrako haragi-hartuemonak eta ez dagiela jan odolustu bako abererik, ezta odolik be. Izan be, judeguek aspalditik irakurtzen eta azaltzen dabe Moisesen legea zapatuero herri guztietako sinagogetan».
Jaunak esana
Erantzun salmoa
Sal 96 [95], 1-2a. 2b-3. 10 (R/. ik. 3)
R/. Zabaldu Jaunaren mirariak herri guztietan.
Edo: Aleluia.
V/. Kanta Jaunari kantu barria,
kanta
Jaunari, lur osoa,
kanta
Jaunari, bedeinkatu haren izena! R/.
V/. Iragarri egunez egun salbatzaile dala.
Zabaldu
haren ospea nazinoetan,
haren
mirariak herri guztietan. R/.
V/. Esaizue nazinoetan: «Errege da Jauna.
Sendo
ezarria dago mundua, ez da kili-kolo egongo;
herriak
zuzenbidez ditu epaitzen». R/.
Aleluia
Jn 10, 27
R/. Aleluia.
V/. Nire ardiek entzuten dabe nire ahotsa, dino
Jaunak;
Nik
ezagutzen ditut,
eta
hareek jarraitu egiten deuste. R/
Ebanjelioa
Iraun nire
maitasunean,
zuen poza
bete-betea izan dadin.
✠ Jesu Kristoren Ebanjelioa San Joanen liburutik
Jn 15, 9-11
Aldi haretan, Jesusek esan eutsen ikasleei:
«Aitak Ni maite izan nauan moduan, halantxe maite izan zaituet Neuk be zuek;
iraun tinko nire maitasunean. Nire aginduak betetzen badozuez, nire maitasunean
iraungo dozue, Neuk be, Aitaren aginduak bete dodazanez, haren maitasunean
irauten dodan moduan.
Hau esan deutsuet nire poza zeuongan izan
dagizuen, eta zuon poza bete-betea izan dadin».
Jaunak esana
IRUZKINA
Danok ezagutzen dogu Jesusen agindua: maite eizue alkar… Baina mailak dagoz maitatze horretan: …neuk maite izan zaituedan lez, izango litzateke maila bat. baina badago beste bat ere: … Aitak ni maite nauan lez. Gorengo mailako maitasun horretara eroan gura gaitu Jesusek, eta horretarako bidea bere aginduak betetea da.
Zelan hartzen doguz aginduak? Aspergarri edo astun lez, behar bada: gure askatasuna murriztuko balebe lez; ez jakuz erakargarri egiten. Gainera, atsekabean sartu geinkeez, ikusten dogulako huts egiten dogula behin baino sarriagotan.
Behin eta barriro entzun behar doguz, ba, Jesusen berbok taupada-doinua balira lez: eurek eroango gaitue gero eta errezago eta pozago Jesusek egin dauana barruratzen, norberetzen…, eta eurek gauzatuko leukeez —eta ez geure ahaleginek— gugandik itxaroten dauzan frutuak.
Maitasunak egintzak eskatzen ditu, frutuak. Eta honeik ez dira gure ahaleginen ondorio, Jesusen aginduak norberetuta izatearenak baino.
Pazkoaldiko V. barikua
I. Irakurgaia
Espiritu
Santuak eta guk erabagi dogu
zuei kargarik
ez ezartzea,
behar-beharrezko
diranak izan ezik.
Apostoluen Eginak liburutik
Eg 15, 22-31
Egun hareetan, apostoluek eta arduradunek, eleiz alkarte osoagaz batera, euren arteko batzuk aukeratu eta Paulo eta Bernabegaz Antiokiara bialtzea erabagi eben. Barsaba deituriko Judas eta Silas aukeratu ebezan, senideen artean ospe handiko gizonak biak, eta gutun hau emon eutsien eroateko:
«Anaia apostoluek eta arduradunek Antiokia, Siria eta Ziliziako jentil-herrietako senideoi, agur! Jakin dogu gure arteko batzuek, guk agindu barik, euren hitzez kezkatu eta nahastu zaitueela. Horregaitik, ordezkari batzuk aukeratzea erabagi dogu aho batez eta zuengana bialtzea, Bernabe eta Paulo geure senide maiteekin, euren burua Jesu Kristo gure Jaunaren zerbitzuan emon daben horreekin. Hor bialtzen deutsueguz, bada, Judas eta Silas, hau bera ahoz jakinazo deizueen. Espiritu Santuak eta geuk erabagi dogu zuei kargarik ez ezartzea, behar-beharrezko diran honeek izan ezik: ez dagizuela jan sasijainkoei eskeinitako haragirik, ez odolik, ez odolustu bako abererik, eta itzi dagizuezala legearen kontrako haragi-hartuemonak. Ondo egingo dozue holakoetatik alde egiten badozue. Izan ondo».
Bialduak, beraz, Antiokiara jaitsi ziran eta, alkartea baturik, gutuna emon eutsien. Irakurri ebenean, pozez bete ziran hitz kontsolagarri hareekin.
Jaunak esana
Erantzun salmoa
Sal 57 [56], 8-9. 10-12 (R/. 10a)
R/. Goratuko zaitut, Jauna, herrien artean.
Edo: Aleluia.
V/. Adoretsu dot bihotza, ene Jainko, adoretsu,
kantatuko
deutsut eta soinua joko.
Iratzartu
zaitez, nire barrua,
izartu,
harpa eta zitara;
iratzartu
dagidan egunsentia. R/.
V/. Goratuko zaitut, Jauna, herrien artean,
kantatuko
deutsut nazinoen artean,
zerua
baino handiagoa da-eta zure maitasuna,
hodeietarainokoa
zure leialtasuna.
Zerua
baino garaiago zara, ene Jainko,
zure
ospea mundu osoaren gain! R/.
Aleluia
Jn 15, 15b
R/. Aleluia.
V/. Zuei adiskide deitzen deutsuet, dino Jaunak,
neure
Aitak jakinazo deustan guztia adierazo deutsuet-eta. R/.
Ebanjelioa
Hauxe agintzen
deutsuet:
maitatu
dagizuela alkar.
✠ Jesu Kristoren Ebanjelioa San Joanen liburutik
Jn 15, 12-17
Aldi haretan, Jesusek esan eutsen ikasleei:
«Hauxe da nire agindua: maitatu dagizuela alkar, Nik maite izan zaituedan lez.
Ez dauka inork maitasun handiagorik, bere bizia lagunen alde emoten dauanak
baino.
Zuek nire adiskide izango zarie, Nik agindua
betetzen badozue. Aurrerantzean ez deutsuet morroi deituko, ze, morroiak ez dau
jakiten nagusiak zer egiten dauan; zuoi adiskide deitzen deutsuet, neure
Aitagandik entzun dodan guztia jakinazo deutsuedalako.
Ez ninduzuen zuek aukeratu Ni, Neuk aukeratu
zinduedazan zuek, eta jarri zaituet joan zaitezen eta frutua emon dagizuen eta
zuen frutuak iraun dagian edonon; holan, Aitari nire izenean eskatuko
deutsazuen guztia emongo deutsue. Hauxe agintzen deutsuet: maitatu dagizuela
alkar».
Jaunak esana
IRUZKINA
Jesusen azken ardurea bere ikasleak dira, eta, honeengan, alkar-maitasuna eta alkartasuna. Ez da agertzen inondik-inora ere bakotxak bere arima salbatzen jardun beharrik. Euren arteko hartu-emona da Jesusen kezkea eta ardurea, eta bere burua jarten deutse jarraibide, agindu lez, gainera.
Neuk maite izan zaituedan lez… Zelango eskakizun maila jarten deutsen! Ez deutse eskatzen maitasun neurtua, bete-betekoa baino, oso-osokoa, besteen alde norbere bizitza emoterainokoa. Makala!
Aitagandik hartu dodan guztia jakinazo deutsuet… Ez dauka Jesusek isilpekorik edo ezer gorde beharrik: ageri-agerikoa da, laua, apala, beretzat ezer gordeten ez dauana, dana besteentzat daukana.
Ez ninduzuen zuek aukeratu Ni… Jesusek berak deitzen eta aukeratzen dau. Eta berak egiten/emoten dauana bere ikasle/aukeratuek ere egin/emon daien aukeratu dauz. Hauxe da, eta ez beste ezer, Jainkoari atsegin jakona.
Hauxe da, ba, Jesusengan sinistea: berak aukeratu gaitula, eta harek gugan egina geuk ere besteengan egin daigula: maitasuna gauzatu.
Pazkoaldiko V. zapatua
I. Irakurgaia
Zatoz Mazedoniara eta lagundu egiguzu.
Apostoluen Eginak liburutik
Eg 16, 1-10
Egun hareetan, Derbera joan zan Paulo eta,
gero, Listrara. Han Timoteo izeneko ikasle bat aurkitu eban; ama judegua eban
eta kristaua; aita, barriz, greziarra. Timoteok izen ona eban Listrako eta
Ikonioko senideen artean. Paulok beragaz eroan nahi izan eban, eta erdaindu
egin eban inguru hareetako judeguakaitik, danek ekien-eta aita greziarra ebana.
Igarotzen ziran urietan, Jerusalemgo
apostolu eta arduradunen erabagiak emoten eutsiezan jakitera, bete egiezan.
Eleiz alkarteak fedean sendotzen eta egunetik egunera jentez ugaritzen joiazan.
Paulo eta Silas Frigia eta Galazia
eskualdeetan zehar joan ziran, Espiritu Santuak galarazo egin eutsen-eta Asia
probintzian hitza zabaltzea. Misiako mugara heldu ziranean, Bitiniarantz jo
nahi izan eben, baina Jesusen Espirituak ez eutsen itzi. Orduan, Misia alde
batera itziz, Troadera jaitsi ziran.
Gauean Paulok ikuskaria izan eban:
Mazedoniako gizon bat azaldu jakon, zutunik, erreguka: «Zatoz Mazedoniara eta
lagundu egiguzu». Paulok ikuskari hau izan baizen laster, Mazedoniara joaten
ahalegindu ginan, ziur gengozan-eta Jainkoak dei egiten euskula, hareei Barri
Ona emotera.
Jaunak esana
Erantzun salmoa
Sal 100 [99], 2. 3. 5 (R/. 2a)
R/. Lurtar guztiok, egin irrintzi Jaunari.
Edo: Aleluia.
V/. Lurtar guztiok, egin irrintzi Jaunari,
zerbidu
egizue Jauna pozaren pozez,
sartu
zaiteze oihu alaiz haren aurrera. R/.
V/. Jakizue Jauna dala Jainkoa,
harek
egin gaitu, harenak gara,
beraren
herri eta beraren larreko artalde. R/.
V/. «Ona
da-eta Jauna,
haren
maitasuna betikoa,
haren
leialtasuna gizaldiz gizaldikoa». R/.
Aleluia
Kol 3, 1
R/. Aleluia.
V/. Kristogaz biztu zarien ezkero,
bilatu
egizuez zeruko gauzak,
han
dago-eta Kristo
Jainkoaren
eskumaldean jesarrita. R/.
Ebanjelioa
Zuek ez zarie
mundukoak,
Nik aukeratu
eta mundutik atara zaituedanez.
✠ Jesu Kristoren Ebanjelioa San Joanen liburutik
Jn 15, 18-21
Aldi haretan, Jesusek esan eutsen ikasleei:
«Munduak gorroto badeutsue, jakizue zuei baino lehen Neuri izan deustala
gorroto. Mundukoak bazinie, munduak maiteko zindukiez, nork berea maite dauan
lez; baina Nik aukeratu eta mundutik atara zinduedazanez, munduak gorroto
deutsue, mundukoak ez zarielako.
Gogoratu esan neutsuena: morroia ez da
nagusia baino handiago. Ni pertsegidu banabe, zeuek be pertsegiduko zaituee;
nire berbea hartu badabe, hartuko dabe zuena be. Nire izenagaitik egingo
deutsuee hori guztia, bialdu nauana ezagutzen ez dabelako».
Jaunak esana
IRUZKINA
Hauxe da Jesusen lehenengo ikasleen esperientzia: judeguek aurrean darabilezala, batez ere agintariek deutse gorroto. Honeik bildur ziran euren jarraitzaileak besteon atzetik joango ete ziran eta euren onurak galduko ete zituen.
Gaur egun ere, han-hor-hemen, badira kristauak aurrean erabiliak, herrialde batzuk euren erlijinoaren arerio ikusten dabezalako.
Baita geure artean ere —euskaldun fededun esaten zan lurralde honetan ere— eleizea, eleizgizonak eta eleiztarrak ere, aurrean erabiliak ez badira be, badira mespretxuz begiratuak; eta umeen artean batez ere, umeren batzuk baztertuak izatea katekesira doazelako, Jaunartzea egingo dabelako edo eleizara doazelako.
Zer pentsa emon behar deusku honek. Ziurrenik, ez gaitue mespresatzen alkar maite dogulako, edo besteen arduraz bizi garalako. Eleizearen historian begitu behar, ea agintepean hartu ez dauzan herritarrak; edo ekandu txarrak emon ez ete deutsezan…
Mundutik askatuak lez baztertuko baginduez, ez hain txarto; baina bestela…
